Tales With Missing Heading

Long overdue, I know, but I finally gotten around into tweaking an old abandoned stuff and will now honor the promise made to Joy-Joy that my next pinoy verse will be dedicated to her.

walang pamagat
(para kay Joy-Joy)

naaaninag kita kahapon
nagkukubli sa lagaslas ng araw
ang payak mo'ng katawan
nagiging palikuran
ng isandaang mga butil ng pawis
umigib ang mga diwata ng pagdadalamhati
sa mga bukal na umusbong
sa iyong pagal na mga bisig

katanghalian ngayon
ikaw ay muling mangungulimbat
sa malawak na gubat
ng pakikipagsapalaran
sasagwan sa mga dalampasigan
at muling bibilang
ng mga sandaling pipilasin
sa mga tangkay
ng bawat buntonghiningang aagos

muli mo'ng maninilayan
ang kahubdan at mga kapansanan
na umaawit sa bawat dagundong
ng iyong magigiting na mga yapak

sunog ang iyong mga balat
humihimlay sa mga anino
ng mga mahinahong alon
ng bugso-bugsong mga
kalungkutan

ang iyong kamalayan
ay masuyong pinupukaw
at idinuduyan ng mga pangarap
iwinawaksi mula sa mga kandungan
ng lumbay

maaring bukas
ang mga ito ay sasaliwaliin
ng mga unos, ng mga walang
humpay na pagkabigo

subalit ngayon
ito ay hindi mo alintana
ang iyong mga titig
nagtatampisaw sa mga ulap
tinatangay
ng mapaglarong
kawalan


24.04.2005/31.01.2008